اب تک آنے والی میری جتنی بھی تالیفات ہیں ان کے حوالہ جات حقیقت‘ سببِ تالیف یہ سب قارئین تک پہنچانے کی ایک کوشش ہے میں ہر کتاب کا حوالہ دوں گا کہ کتاب کن حوالہ جات سے مل کر ایک کتاب بنی ہے۔اگر میری کسی کتاب میں غلطی ہو‘ اطلاع دیں‘ شکرگزار ہوں گا۔
چونکہ اس سے پہلے مختلف ادارے میری کتب شائع کرتے تھے اب اکثر کتب عبقری ادارہ شائع کررہا‘ مختلف اداروں نے بہت سے حوالے چھوڑ دئیے‘ یاد رکھیں! کتاب اگر حوالہ کے ساتھ ہو تو تحقیق‘ اور تالیف اگر حوالہ کے بغیر ہو تو سرقہ اور چوری شمار ہوتی ہے‘ اس لیے اب پھر سےمیں اپنی کتب کی غلطیاں خود نکال کر شائع کررہا ہوں تاکہ میری اور کتب کی اصلاح ہوتی رہے۔کتاب نمبر55:مایوس نوجوان ویران جوانی:بندہ کے پاس سالہاسال سے دوران طب ایسے حیرت انگیز حالات سننے کو ملتے ہیں جن کا تذکرہ باعث شرم اور داستان ندامت ہے‘ ان میں اکثر نوجوان نسل یہ داستانیں بیان کرتی ہیں۔ آخر اس کی وجہ کیا ہے کہ نوجوان نسل مایوس ہے اپنے کام سے‘ اپنے جسم سے حتیٰ کہ ماں اور باپ سے‘ اس کتاب کو تالیف کرنے کا مقصد دراصل نوجوانوں کی ان خواہشات کا علاج ہے۔ یہ کتاب 2005ء میں لاہور سے شائع ہوئی اور الحمدللہ! بے شمار نوجوانوں کو اس تالیف سے نئی زندگی ملی جس کا ثبوت بے شمار پیغامات بذریعہ فون‘ خطوط‘ انٹرنیٹ موصول ہوئے اور اب تک ہورہے ہیں۔ اس شاندار تالیف کیلئے جن رسالہ جات سے مواد اکٹھا گیا ان کے نام درج ذیل ہیں:۔ ماہنامہ حکایت۔ ہمدرد صحت۔ ضیاء الحکمت۔ رہنمائے صحت۔ نفسیات اور زندگی۔ قومی صحت۔ خبرنامہ ہمدرد۔ سیارہ ڈائجسٹ۔ طبیب حاذق۔ اسرار حکمت۔ نوٹ: اگر کوئی حوالہ غلطی سے رہ جائے تو ضرور اطلاع دیں‘ میں ہر پل اصلاح کا محتاج ہوں۔(ایڈیٹر)